ການເວັ້ນຈາກຄວາມຊົ່ວທັງປວງ

ການເວັ້ນຈາກການທຳຄວາມຊົ່ວທາງກາຍ ຂັ້ນພື້ນຖານ 3 ປະການຄື:

1. ປານາຕິປາຕາ ເວຣະມະນີ ເວັ້ນຈາກການປົງຊີວິດ ເວັ້ນຈາກການຂ້າ ການບຽດບຽນຮ່າງກາຍ ທໍາລາຍຊີວິດ ແຕ່ໃຫ້ມີຄວາມເມດຕາກະຣຸນາ ຊ່ວຍເຫຼືອເກື້ອກຸນກັນ.

2. ອະທິນນາທານາ ເວຣະມະນີ ເວັ້ນຈາກການຖືເອົາສິ່ງຂອງ ທີ່ເຈົ້າຂອງເຂົາ ບໍ່ໄດ້ໃຫ້ ເວັ້ນຈາກການລັກ ສໍ້ໂກງ ລະເມີດກຳມະສິດ ທຳລາຍຊັບສິນ ສົມບັດ ແຕ່ໃຫ້ມີຄວາມເຄົາຣົບກຳມະສິດໃນຊັບສິນຂອງຜູ້ອື່ນ.

3. ກາເມສຸມິຈສາຈາຣາ ເວຣະມະນີ ເວັ້ນຈາກການປະພຶດຜິດໃນກາມ ເວັ້ນຈາກການລະເມີດສິ່ງທີ່ຜູ້ອື່ນຮັກໃຄ່ ຫວງແຫນ ບໍ່ລ່ວງລະເມີດປະເພນີ ທາງເພດ. ການເວັ້ນຈາກການທຳຄວາມຊົ່ວທາງວາຈາ ຂັ້ນພື້ນຖານ

4 ປະການຄື:

1. ມຸສາວາທາ ເວຣະມະນີ ເວັ້ນຈາກການເວົ້າຕົວະຫຼອກລວງ

2. ປີສຸນາຍະ ວາຈາຍະ ເວຣະມະນີ ເວັ້ນຈາກການເວົ້າສຽດສີ ນິນທາໃຫ້ແຕກສາມັກຄີ ຍຸແຍ່

3. ຜະຣຸສາຍະ ວາຈາຍະ ເວຣະມະນີ ເວັ້ນຈາກການເວົ້າຄໍາຫຍາບ ຄໍາແຂງ ກະດ້າງ

4. ສັມຜັປປະລາປາ ເວຣະມະນີ ເວັ້ນຈາກການເວົ້າຈາເລື່ອນລອຍ ບໍ່ມີສາຣະ ປະໂຫຍດ.

ການລະເວັ້ນການກະທຳຊົ່ວທາງໃຈຂັ້ນພື້ນຖານ 3 ປະການຄື:

1. ອະພິຊຊາລຸ ເວຣະມະນີ ເວັ້ນຈາກການຄິດເພັ່ງເລັງ ຢາກໄດ້ຂອງຄົນອື່ນ

2. ພະຍາປາທາ ເວຣະມະນີ ເວັ້ນຈາກການຄິດພະຍາບາດຄິດປອງຮ້າຍ

3. ມິຈສາທິຕຖິ ເວຣະມະນີ ເວັ້ນຈາກການເຫັນຜິດຈາກຄອງທັມຜູ້ອື່ນ

ເວັ້ນຈາກອະປາຍະມຸກ ຄືປາກທາງແຫ່ງຄວາມເສື່ອມ ທາງແຫ່ງຄວາມ ພິນາດ ຫຼືເຫດແຫ່ງຄວາມຈິບຫາຍໂພຄະຊັບ 6 ປະການ:

1. ເວັ້ນຈາກການເສບຕິດສຸຣາແລະຢາເມົາ

2. ເວັ້ນຈາກການມັກທ່ຽວກາງຄືນ

3. ເວັ້ນຈາກການມັກທ່ຽວເບິ່ງການຫຼິ້ນມະຫໍລະສົບຄົບງັນ

4. ເວັ້ນຈາກການຕິດການພະນັນ

5. ເວັ້ນຈາກການຄົບຄົນຊົ່ວເປັນມິດ 

6. ເວັ້ນຈາກການກຽດຄ້ານທໍາການງານ